Lugo acollerá en setembro o II Foro da la de Galicia organizado por OVICA
A Asociación de Criadores de Ovino e Caprino de Galicia (OVICA) organiza o II Foro da la de Galicia, unha iniciativa que busca dar visibilidade á situación actual da la das ovellas e destacar tanto os seus usos tradicionais como as aplicacións máis innovadoras.
O evento celebrarase no soto da Praza de Abastos de Lugo o 13 e 14 de setembro, cun horario de 11 a 20 horas o sábado e de 11 a 14 horas o domingo.
Durante a fin de semana o público poderá visitar exposicións e postos de venda arredor do mundo da la, asistir á proxección de documentais relacionados coa gandaría e participar nunha mesa redonda sobre a viabilidade de instalar un lavadoiro de la en Galicia. Ademais, o foro incluirá propostas musicais e narración oral para animar a xornada.
OVICA leva anos traballando neste eido a través de diferentes liñas, como o contacto con cooperativas e lavadeiros fóra de Galicia, iniciativas de investigación que exploran novos usos da la e a creación dun grupo de traballo a nivel galego.
A entidade subliña que a sensibilización da cidadanía é un dos piares do proxecto, xa que considera fundamental que a la sexa recoñecida como a materia prima de gran valor que realmente é.