Lugo acollerá unha nova xornada da Fundación Enki con preto de 300 escolares
A Fundación Enki celebrará en Lugo unha nova edición dos seus encontros provinciais dirixidos a escolares, nos que participarán preto de 300 alumnos e alumnas procedentes de nove centros educativos da provincia. A actividade desenvolverase o luns 9 de marzo no estadio Gregorio Pérez Rivera, en horario de 10.00 a 13.30 horas.
A xornada contará coa presenza do concelleiro da área de Urbanismo, Deportes e Xuventude do Concello de Lugo, Jorge Bustos Atanasio, que asistirá acompañado polo presidente da Fundación Enki, Ángel López, e pola directora da entidade, Carmen Touza.
Estas actividades forman parte das Xornadas de Sensibilización en Centros Educativos de Galicia impulsadas pola Fundación Enki, unha iniciativa que busca promover a inclusión a través do deporte adaptado. Durante a mañá, o alumnado poderá participar nun amplo programa de propostas deportivas inclusivas deseñadas para achegarlles a realidade da diversidade funcional.
A organización destas xornadas conta coa colaboración de distintas entidades e clubs deportivos, entre eles o Club Atletismo Sada (CAS), Atletismo Adaptado e a Asociación Sociocultural ASCM Boccia. Ademais, a iniciativa dispón do apoio da Xunta de Galicia, Vegalsa-Eroski, Grupo Lanzal, Mastil e Quincemil.
Nesta edición tamén participa de maneira especial Héctor Francesch, que achegará as súas ilustracións para traballar diferentes contidos nas actividades programadas.
Durante a xornada, os escolares poderán experimentar en primeira persoa distintas disciplinas deportivas adaptadas a través das estacións coñecidas como “ponte no meu lugar”. Estas propostas están pensadas para fomentar a empatía entre o alumnado e contribuír a derrubar estereotipos arredor das persoas con diversidade funcional.