Lugo acolleu a Carreira Solidaria pola Doazón de Órganos e Tecidos de Alcer
O deputado de Formación, Ensino e Economía do Coñecemento, Miguel Fernández Méndez, participou na Praza de Santa María na entrega de medallas da primeira Carreira Solidaria pola Doazón de Órganos e Tecidos, organizada pola Asociación para a Loita contra as Enfermidades Renais de Lugo (Alcer Lugo).
No acto de entrega, Fernández destacou a importancia deste evento deportivo solidario, que ten o poder de mobilizar a centos de persoas e concienciar sobre a relevancia da doazón de órganos e do coidado da saúde. “É fundamental resaltar que un único doante pode salvar a vida de ata oito persoas”, subliñou.
Lembrou que a institución provincial colabora con esta asociación cunha achega de 5.000 euros destinados a facilitar o seu labor, que consiste na mellora da calidade de vida das persoas con insuficiencia renal crónica na provincia.