Lugo activa un operativo especial de limpeza en 17 centros educativos públicos
A área de Medio Ambiente do Concello de Lugo puxo en marcha este venres un plan intensivo de limpeza en 17 centros educativos públicos do municipio, entre colexios e garderías, co obxectivo de deixalos a punto para o arranque do curso escolar. As tarefas comezaron esta mesma tarde cos traballos nos pavillóns e patios, que se prolongarán ata o 15 de setembro, combinando accións no interior e no exterior das instalacións.
O dispositivo conta cun equipo de 20 operarios e operarias que dedicarán máis de 800 horas á limpeza interior e outras 206 ás zonas exteriores. A tenente de alcalde e responsable de Cohesión Territorial, Ana González Abelleira, achegouse ata o colexio de Albeiros, onde se iniciou o operativo, e explicou que este reforzo é posible grazas ao novo contrato de limpeza aprobado o 17 de xaneiro, que incorporou un incremento do 17% no persoal, a modernización dos recursos materiais e un aumento do 34% nas horas de servizo.
Segundo a edil, este contrato permite dispor dunha bolsa de horas adicionais para reforzar a limpeza en dependencias municipais segundo as necesidades, como ocorre agora cos colexios e garderías ante o inicio das clases. González Abelleira subliñou que o obxectivo é garantir que todos os centros estean en condicións óptimas para recibir ao alumnado.
Este operativo súmase ao labor que xa realizan de forma habitual entre dous e tres limpadores por centro. A intervención abrangue instalacións como o CEIP Luis Pimentel, Quiroga Ballesteros, Nadela, Gándaras, Paradai, Albeiros, Sagrado Corazón, Illa Verde, Menéndez Pelayo, As Mercedes, Casas, A Anexa, A Ponte e Rosalía de Castro, así como as garderías de Illa Verde, Rosalía de Castro e Fingoi II.
As tarefas exteriores, xa en marcha, céntranse en patios, pavillóns e zonas de xogo, empregando maquinaria de auga a presión e tratamentos específicos. Tamén se actúa no mobiliario urbano, como bancos, papeleiras, farois e balaustradas. No interior dos centros, os traballos desenvolveranse entre o 1 e o 9 de setembro, coincidindo co inicio do curso o día 8, co fin de contar con persoal dispoñible ante calquera incidencia.
Entre as actuacións previstas inclúense a posta a punto de aulas, corredores, aseos, comedores e novas dependencias como a biblioteca do CEIP Menéndez Pelayo, que este ano abre as súas portas tras unhas obras. Tamén haberá intervencións especiais en centros que realizaron reformas no verán, como o colexio das Mercedes no barrio do Montirón, que renovou a cuberta e precisa dunha limpeza máis profunda.
Desde a área municipal de Medio Ambiente destacan que se atenderán as demandas particulares dos distintos colexios, que van desde limpezas integrais tras obras ata actuacións en zonas de xogo, areneros ou a eliminación de pintadas en muros e paredes mediante vapor de auga e produtos específicos autorizados.