Amplían en 70 as prazas dos cursos de ximnasia e natación para maiores de 65 anos en Lugo
O Concello de Lugo decidiu incrementar en 70 as prazas destinadas aos cursos de ximnasia e natación para maiores de 65 anos, despois de que as 330 ofertadas a finais de agosto se cubrisen en apenas uns días debido á elevada demanda. Con esta ampliación, o número total de prazas ascenderá a 400, consolidando estas actividades como unha das máis solicitadas do programa deportivo municipal.
A área de Deportes, dirixida por Jorge Bustos, habilita 50 novas prazas na piscina de Frigsa, que se repartirán entre os cinco grupos xa en funcionamento, mentres que nas instalacións de As Pedreiras créase un novo curso cun total de 20 prazas, que se desenvolverá en horario de 12:00 a 12:45 horas.
A matrícula para acceder a estas novas prazas deberá formalizarse os días 24, 25 e 26 de setembro nas oficinas de Frigsa, entre as 8:00 e as 14:00 horas. O custo mantense en 7,90 euros anuais por curso, que inclúe tres sesións semanais, e o pagamento poderá realizarse con tarxeta bancaria ou mediante ingreso en conta, presentando o formulario dispoñible nas propias oficinas.
O concelleiro de Deportes destacou que estas clases son unha das actividades máis demandadas polos maiores, polo que as prazas se cubriron rapidamente a comezos de setembro, deixando fóra a varias persoas. Ante esta situación, o goberno local optou por ampliar a oferta co obxectivo de promover o ocio activo e saudable da poboación de máis idade.
Cómpre lembrar que, a comezos de mes, a área de Deportes puxo a disposición da cidadanía preto de 1.000 prazas para o primeiro trimestre dos cursos de natación nas piscinas de Frigsa e As Pedreiras, adaptados a diferentes idades e niveis, aos que se suman as clases específicas para maiores de 65 anos que combinan ximnasia e natación.