Lugo aposta por un dispositivo de limpeza con recollida selectiva e 95 operarios durante o Arde Lucus
O dispositivo de limpeza do Arde Lvcvs incorpora este ano recollida selectiva nos campamentos e instalacións propias da festa.
O alcalde, Miguel Fernández, destacou o despregamento do servizo, que comezará a traballar ás 05.30 horas para garantir o bo estado da cidade e o desenvolvemento óptimo do evento.
O rexedor subliñou que nesta edición contarán con medios técnicos e humanos sen precedentes, con 95 traballadores e preto de 50 vehículos, maioritariamente eléctricos para minimizar as molestias e garantir a sustentabilidade ambiental.
Nas semanas previas realizáronse tarefas de roza, fregado de beirarrúas, eliminación de pintadas e mantemento do mobiliario urbano, especialmente papeleiras e contedores. Haberá reforzos en actividades concretas como os desfiles con cabalos, as demostracións de oficios artesanais e unha limpeza intensiva na zona de Ramón Ferreiro, onde se sitúan os restaurantes.
Para facer a festa máis sostible, instalaranse illotes de contedores con varias fraccións de reciclaxe que se recollerán frecuentemente, incrementando tamén o número de contedores operativos, incluíndo os soterrados da zona interior da muralla. Nos campamentos colocarase contedores para a fracción resto, bolsa amarela e orgánica, que deberán estar fóra dos campamentos ás 05:30 para a recollida.
A limpeza desenvolverase diariamente con planificación específica: o xoves 12 instalaranse os contedores e realizarase unha limpeza intensiva previa á entrada das tropas romanas. O venres 13 limparase a zona centro e baleiraranse os contedores. O sábado 14 o servizo comezará ás 05:30 coa limpeza dos botellóns e do percorrido dos desfiles. O domingo repetirase o inicio cedo e realizarase un plan especial de limpeza, prestando atención á praza Horta do Seminario e á muralla, especialmente na zona do adarve.
Desde finais de maio e durante xuño realizáronse traballos de fregado a alta presión, roza manual e mecánica, limpeza de papeleiras, eliminación de pintadas e colocación de contedores nas zonas dos campamentos e na explanada do pavillón municipal. O luns 16 iniciarase a limpeza e recollida de residuos das zonas de actividades do Arde Lvcvs, coa retirada de todos os contedores e illotes, e un plan especial de varrido manual complementado con varredoras, ademais da recollida en todas as zonas dos campamentos.