Lugo celebra a XXVII Mostra de Música Tradicional do Domingo das Mozas
A Asociación de Gaiteir@s Galeg@s organiza, co patrocinio da área de Cultura do Concello de Lugo, a XXVII edición da Mostra de Música Tradicional do Domingo das Mozas, que contará coas actuacións de máis dunha decena de grupos procedentes de distintos puntos de Galicia.
As actuacións desenvolveranse en horario de mañá, de 11.30 a 14.00 horas, e de tarde, de 17.00 a 18.00 horas, realizando pasarrúas polas prazas e rúas do centro amurallado para que todas as persoas que se acheguen á cidade poidan disfrutar da música tradicional galega desde a entrada. Polo mediodía, os grupos rematarán a súa actuación diante do Concello cunha peza interpretada todos xuntos.
Con formacións diversas, desde gaitas e pandeiretas ata murgas e treboadas, os músicos encherán de sons tradicionais o casco histórico da cidade no día máis emblemático das festas patronais.
Entre os grupos participantes nesta edición destacan Gaiteiros da Ría, Maghúa, Os Fondaos do Pífaro, Os Monifates, Par de Par, Pingarela, Sadeo Pandeireteiras, Senfol Gaiteiros, Sons do Abrente e Tumba e Dalle. Pola tarde, as rúas volverán encherse de música a partir das 17.00 horas, para rematar na Praza de Santa María cos concertos de Lagharteiras, ás 18.00 horas, e Fiandola, ás 20.00 horas.
Esta mostra, que ano tras ano xunta aos mellores grupos de música tradicional galega, ten como finalidade a exaltación do patrimonio musical e a súa difusión entre o público, facendo de Lugo un referente en toda Galicia ao demostrar que a música tradicional pode ser a protagonista das festas na rúa.