Lugo celebra o día grande do San Froilán cunha xornada chea de música, tradición e festa
Lugo esperta este domingo coa emoción do seu día grande. O San Froilán, patrón da cidade, volve encher as rúas de vida, sons e cores nunha das festas máis emblemáticas de Galicia.
Tras a intensa xornada de onte, cando deron comezo oficialmente as celebracións, hoxe a cidade amence preparada para vivir unha das datas máis esperadas polos lucenses e polos milleiros de visitantes que cada ano acoden a gozar desta cita centenaria.
As prazas e rúas do centro histórico converteranse nun enorme escenario onde a tradición e a modernidade se dan a man. A mañá comeza coa XXXII Feira do Mel na Praza da Soidade, que inclúe un obradoiro de velas artesanais, e coa III Feira de Alfarería Lugo Tradicional na Praza de Santo Domingo, que exhibe o mellor da cerámica galega ata o serán. Xunto ao Vello Cárcere, EXPOLUGO reúne as principais razas autóctonas de Galicia, mentres o parque Rosalía de Castro acolle unha nova edición do San Froilán Teixedeiro, un espazo participativo que convida á creación con materiais propios da terra.
A animación continúa nas rúas coa presenza de feiras de antigüidades, grupos de música tradicional e pasarrúas de formacións como Os Picurruchos, Caivanca, Cántigas e Frores ou Foliada de Bosende, que levarán o espírito do San Froilán a cada recuncho. Un dos momentos máis solemnes da xornada será a ofrenda da Corporación municipal na Catedral, onde se renderá homenaxe ao patrón da cidade.
A música ocupará un papel protagonista ao longo de todo o día. Haberá concertos da Banda Filharmónica de Lugo xunto coa Banda de Vilalba, actuacións de Mocho Gris na Praza da Mosqueira e unha verbena de mediodía en Augas Férreas coa orquestra Suavecito. Tamén o público familiar gozará co espectáculo itinerante Pilots de La Finestra e co San Froilán Mágico en tu barrio, que presenta o espectáculo “50 (1975-2025)” na Praza do Castiñeiro.
A tarde estará marcada polo tradicional Desfile de Gando, que percorrerá o centro histórico acompañado por Reviravolta e Os Pelúdez, e pola continuidade das actividades artesanais no Rosalía de Castro. Pola noite, Lugo converterase nun auténtico fervedoiro musical: Cristina Branco actuará na Praza de Santa María, Xoel López será o prato forte na Horta do Seminario e o Electronic Lucus Fest encherá de ritmo a Praza da Mosqueira ata a madrugada. Pecharán a xornada Biznaga, a orquestra Stereo e o espectáculo festivo dos Festicultores Troupe.