Sociedade

O acto ‘21/3 Rodando a vida’ combinará teatro, música e recoñecementos nun espazo aberto á cidadanía

A Facultade de Veterinaria de Lugo acollerá este sábado, 21 de marzo, a celebración do Día Mundial da Síndrome de Down cun acto organizado pola asociación Down Lugo e a Federación Down Galicia baixo o título ‘21/3 Rodando a vida’. A cita comezará ás 19.15 horas e está concibida como un encontro aberto á cidadanía que combina visibilización, cultura e reivindicación.

A gala estará conducida pola Compañía de Teatro Down Lugo xunto co alumnado da Escola Palimoco Teatro Danza, que darán forma a unha proposta escénica na que se mesturarán emoción, humor e reflexión arredor da inclusión. O evento contará tamén coa actuación do músico Abraham Cupeiro, que achegará a súa particular visión artística ao programa.

Durante a xornada, as persoas asistentes poderán escoitar a lectura do Manifesto pola Promoción da Autonomía Persoal, un dos momentos centrais do acto, así como asistir á entrega dos XI Premios Down Galicia. Estes galardóns recoñecen o compromiso coa igualdade e a autonomía das persoas coa síndrome de Down.

Nesta edición, os premios recaen en Alejandro Méndez Lázare, pola súa colaboración desinteresada con Down Lugo a través de actividades formativas e da gala gastronómica solidaria “10 razóns”, e na Universidade de Santiago de Compostela, pola súa implicación nos programas formativos desenvolvidos no Campus de Lugo dirixidos a persoas coa síndrome de Down e outras discapacidades intelectuais.

O auditorio transformarase para a ocasión nun cine improvisado que renderá homenaxe ás salas de Lugo no ano 1996, coincidindo coa creación de Down Lugo, nunha escenografía que tamén fará un guiño aos Premios Mestre Mateo, que se celebran esa mesma noite na cidade.

Representantes das xuntas directivas de Down Lugo e Down Galicia estarán acompañados por autoridades municipais, autonómicas e provinciais nun acto que busca ser un punto de encontro para a sociedade, promovendo a inclusión, a visibilidade e a defensa dos dereitos das persoas con síndrome de Down.