Lugo Monumental alerta da falta de solución á oficina de turismo tras máis de dous meses pechada
A asociación Lugo Monumental considera alarmante que, despois de máis de dous meses e medio, o Concello aínda non fose quen de solucionar os problemas de ratas e malos cheiros detectados na oficina de turismo da Praza do Campo, unhas deficiencias que obrigaron a manter o servizo pechado desde finais de novembro. Para o colectivo, a resposta municipal non está a ser axeitada, xa que o persoal foi trasladado á sala de exposicións Porta Miñá, un espazo pouco visible e complicado de localizar para quen visita a cidade por primeira vez, unha situación que se agravou tras o sinistro rexistrado recentemente na Muralla a consecuencia dos temporais, que incrementou o illamento da zona.
Lugo Monumental tamén chama a atención sobre a ausencia total de sinalización na oficina clausurada, onde non existe ningún cartel que informe do peche nin indique a nova localización do servizo. A asociación lembra que se trata dun punto de atención dirixido a persoas que non coñecen Lugo e que, ao achegarse no horario habitual, atópanse coa porta pechada sen ningunha explicación nin orientación alternativa.
Ante este escenario, o colectivo propón varias opcións que considera viables. Entre elas, suxire empregar como oficina de turismo o denominado Edificio de Novas Tecnoloxías, situado na praza Ángel Fernández Gómez, na parte traseira do Concello, un inmoble cun uso moi reducido pese a atoparse nunha localización privilexiada. Segundo indica, o feito de contar cun acceso independente evitaría problemas de seguridade e permitiría, ademais, poñer en valor os restos existentes nese emprazamento. No caso de que esta alternativa non fose posible, Lugo Monumental aposta polo alugueiro dun local no centro urbano, facilmente identificable para os visitantes. Como última opción, a asociación ofrece a súa propia sede da rúa da Raíña, que, aínda estando nunha galería comercial, considera máis céntrica e accesible que a actual localización provisional, sempre que se realice unha correcta sinalización.
Por outra banda, Lugo Monumental diríxese tamén á Xunta de Galicia para reclamar que as obras de reparación do tramo derrubado da Muralla se leven a cabo coa máxima rapidez, tanto pola conservación do principal símbolo patrimonial da cidade como polo impacto que a situación está a ter nos negocios da contorna. A asociación lembra que establecementos como o Portón sufriron durante anos as consecuencias do peche da Rúa do Moucho, que permaneceu inaccesible durante un cuarto de século e que só foi reaberta ao tránsito peonil tras reiteradas denuncias presentadas polo propio colectivo.