Lugo Monumental alerta do deterioro da casa en ruínas da Praza do Campo
A Asociación Lugo Monumental denuncia o "grave estado de abandono" dun inmoble situado na Praza do Campo, un dos espazos máis transitados do casco histórico e punto clave da zona dos viños. Trátase dunha edificación próxima ás dúas oficinas de turismo da cidade, que permanece valada desde hai máis de tres anos pola posibilidade de desprendementos, afectando a veciños, establecementos e visitantes.
A entidade lembra que xa en maio de 2022 presentou denuncias tanto no Concello de Lugo como na Xunta de Galicia para advertir do risco existente en dous puntos concretos: a casa en ruínas da Rúa do Moucho —que mantivo a vía pechada durante preto de 25 anos— e o edificio da Praza do Campo. No primeiro caso, a apertura recente da rúa ao tránsito peonil evidenciou, segundo a asociación, que se trataba dun exemplo de desatención prolongada durante décadas. Non obstante, no segundo punto a situación non só non mellorou, senón que se intensificou.
Lugo Monumental asegura que o estado actual do inmoble resulta inadmisible, especialmente pola visibilidade e simbolismo do emprazamento, que constitúe un dos enclaves máis visitados polos turistas. A presencia continuada de valados e o perigo que representa a estrutura deteriorada están a xerar, sinalan, importantes prexuízos para os locais comerciais e a imaxe global do barrio histórico.
A asociación insiste en que o marco legal ofrece ferramentas amplas para actuar: desde sancións ata execucións subsidiarias ou mesmo expropiacións forzosas, mecanismos contemplados tanto na Lei do Solo de Galicia como na Lei de Rehabilitación. Estas normativas establecen que a intervención debe ser coordinada entre o Concello e a administración autonómica.
Por este motivo, Lugo Monumental diríxese de novo a ambas institucións para demandar unha resposta definitiva: ao Concello, polas súas competencias urbanísticas; e á Xunta, como responsable de Patrimonio. Subliñan ademais que non se trata dun caso illado, xa que existen outros edificios en mal estado dentro da Muralla, algo que consideran paradoxal tendo en conta que se aspira a lograr a declaración de Patrimonio da Humanidade. A entidade destaca, con todo, que o da Praza do Campo é un dos exemplos máis significativos polo seu valor estratéxico e pola repercusión que a súa imaxe ten na actividade diaria da zona.