Lugo Monumental demanda unha ampliación no horario da Oficina de Turismo da Xunta
Durante os recentes días de Semana Santa a cidade de Lugo recibiu un gran número de visitantes, que viron con sorpresa que a Oficina de Turismo da Xunta de Galicia situada na rúa do Miño estaba pechada, tal e como se denunciou desde o Concello de Lugo.
Isto pon sobre a mesa un problema que desde Lugo Monumental levan tempo demandando e é que se han de axustar os horarios da devandita oficina á realidade turística da cidade, sobre todo se se pretende potenciar a Lugo como un destino turístico de calidade.
Actualmente os horarios son de luns a venres de 9.30 a 14.00 e 16.30 a 19.00 e os sábados de 11.00 a 13.30. “Devanditos horarios son claramente insuficientes e a súa distribución non parece a máis adecuada polo que desde Lugo Monumental propoñemos os seguintes: de luns a sábado de 9.00 a 14.00 e de 18.00 a 20.00 horas e os domingos e festivos de 10.00 a 14.00 horas”.
A asociación explica que este horario é adecuado dado que a oficina tamén é un punto de referencia para os peregrinos entendendo que é importante que abra á primeira hora da mañá, xa que os que pasen a noite en Lugo deberían poder saír cedo da cidade tras acudir á oficina para resolver as dúbidas que poidan ter no relativo ao Camiño.
Polas tardes cren que é mellor abrir un pouco máis tarde e pechar tamén algo máis tarde que actualmente, dado que ademais complementaríanse os horarios coa oficina municipal de turismo que pecha ás 18.00 horas.
Os domingos e festivos, días de gran afluencia de visitantes, non lles parece razoable que a oficina estea pechada, aínda que entenden que podería ser suficiente cunha apertura en horario de mañá, aínda que con días extraordinarios en pontes e festivos encadeados (como é o caso da recente Semana Santa) en que sería razoable abrir tamén de tarde (por exemplo o Xoves Santo, ao ser o Venres festivo, parecería lóxico facer un pequeno esforzo adicional).
Dende Lugo Monumental son conscientes que é unha cuestión complexa en canto á xestión do persoal, pero tamén ven que a solución existe e que se aplica en cidades como Coruña, Santiago ou Vigo, polo que Lugo, unha cidade con nada menos que tres elementos declarados Patrimonio da Humanidade, é merecedora dun tratamento similar.
OUTRAS LOCALIZACIÓNS
Ademais, afirman que “o emprazamento da Oficina de Turismo non parece o máis adecuado, dada a dificultade que os visitantes teñen para localizala. Hai anos xestionáronse uns puntos de información electrónicos nalgúns dos fielatos da Muralla (concretamente o da Porta de Campo Castelo foi dos máis exitosos) que levan décadas abandonados”.
En todo caso, cren que en períodos estivais e de tempada alta sería adecuado establecer oficinas de turismo temporais nalgunha localización máis accesible aos turistas e máis visible, como poidan ser algún dos principais fielatos (Campo Castelo ou Aguirre), a estación de autobuses de Lugo (titularidade da Xunta de Galicia) ou mesmo locais comerciais que se poderían arrendar por tempadas para ese fin.
A ASOCIACIÓN BRÍNDASE A COLABORAR
Por iso, a Asociación rexistrou esta mañá un escrito dirixido á Xunta de Galicia en que se recollen estas demandas e, como é habitual en Lugo Monumental, bríndanse a colaborar coa administración para detectar as carencias actuais e para buscar solucións conxuntas, o que redundará nunha mellor atención ao visitante e, por tanto, un incremento na competitividade conxunta da cidade como destino turístico.