Lugo Monumental lamenta que a comisaria da Policía Nacional non se manteña preto do centro histórico
A asociación Lugo Monumental considera unha mala noticia que o centro histórico non vaia a albergar a nova comisaría e cre que é necesario tomar cartas no asunto sobre “a paulatina desaparición de servizos no centro”. Consideran que a reforma do edificio coñecido como de “obras públicas” parecía unha boa opción que xa que daría uso a un inmoble que actualmente ten plantas abandonadas e enmarcaríase nunha política ecoloxista de reciclaxe de edificios.
Lugo Monumental rexistrou varios escritos dirixidos á Alcaldía, a Subdelegación do Goberno e ao Ministerio do Interior nos que se solicita que se reformulen a decisión de afastar do centro histórico a localización da nova comisaría de Policía. A recolocación da Policía Local á zona sur do centro urbano e a previsión de mover a da Nacional á norte descentran completamente, segundo eles, a protección do centro histórico, algo que é desfavorable para a zona.
Denuncian unha perda paulatina de servizos. “O centro viu como nas últimas décadas se foron trasladando servizos e centros a outras zonas, en moitas ocasións con pobres resultados”. E aseguran que se o MIHL estivera no centro histórico “o seu uso e afluencia serían outros totalmente diferentes”, postura que tamén comparten co novo Auditorio, cuxo proxecto orixinal estaba situado en San Fernando pero que foi trasladado a Magoi. “O que fai prever que o seu uso reducirase aos grandes eventos pero que no día a día será outro edificio infrautilizado”.
Denuncian unha perda de servizos no centro
Segundo o colectivo, os servizos médicos, de emprego e demais tamén se foron desprazando paulatinamente fóra da zona e mesmo as comunicacións afástanse do centro histórico coa construción da Intermodal, sendo o único caso en Galicia en que se dá un paso moi discutible porque “para a maioría os principais usuarios a localización actual da estación de autobuses é moito mellor”. Outro exemplo de construcións cuxo uso consideran difícil de defender é o Impulso Verde, situado “nun lugar de xeito evidente inadecuado e que leva meses baleiro, algo que non ocorrería se se edificou nun solar máis céntrico”.
Engaden os proxectos de museos afastados do centro como poidan ser o que a Confederación planifica no antigo Restaurante O Muíño ou a proposta do Concello de facer outro sobre o viño na vella Fábrica da Luz, “algo que se converterá nun sonoro fracaso como o foron as Caldas” e que dada a súa natureza artificial “non tiñan por que estar xunto ao Río Miño e poderían situarse nunha zona máis accesible como as costas do Parque de Rosalía”.
Ademais de solicitar a Interior que se reformulen o proxecto e que dean unha localización céntrica á Policía Nacional, pedirán a todas as administracións o acceso a unha listaxe de inmobles de titularidade pública no municipio de Lugo para poder analizar os que están en uso e os que non.