Lugo Monumental reclama a apertura da porta falsa
A Asociación Lugo Monumental rexistrou un escrito dirixido ao Concello de Lugo en que solicita a inmediata reapertura da Porta Falsa, recalcando o atraso nas obras, cuxas fases de execución non se están cumprindo.
A afluencia peonil pola Porta Falsa é notable, debido a que permite que unha parte importante da poboación entre ao centro histórico sen ter que rodear por San Fernando ou pola rúa Teatro.
Indican que a previsión era que as obras terminasen o día 27 de xullo, é dicir, 10 semanas despois do seu inicio (falábase de dúas fases que durarían 5 semanas cada unha delas). "A día 18 de outubro as obras seguen sen terminarse e os accesos continúan pechados, o que prexudica enormemente aos establecementos da zona así como aos lucenses, particularmente aos que teñen aos seus fillos no colexio da praza de Ferrol".
Árbores danadas
En canto ás obras en si, a Asociación denuncia que se danaron árbores (por exemplo na rúa Montevideo) durante a execución das mesmas, e isto tivo lugar porque non se cumpriu o que indica expresamente o PEPRI no seu artigo 53.4. "Cando a execución dunha obra, maior ou menor, poida afectar, danar ou menoscabar algún exemplar arbóreo público ou privado que houbese de conservarse segundo a licenza outorgada, esixirase polo Concello e garantirase polo construtor que durante o transcurso das obras o tronco e as ramas máis expostas, ata unha altura mínima de 2,5 m, dispoñan dun adecuado recubrimento ou protección ríxida que impida a súa deterioración".
A Asociación lembra ao Concello os deberes que a súa propia norma imponlle e solicita un seguimento serio e rigoroso sobre este asunto.
A Asociación non conta con recibir resposta a este escrito, "xa que o Concello non respondeu a ningún dos remitidos ata o de agora, ninguneando a unha entidade que a día de hoxe representa a 140 establecementos do centro histórico de Lugo".