Lugo Monumental revela un censo con 569 actividades económicas no casco histórico
A Asociación Lugo Monumental presentou un exhaustivo censo que recolle todas as actividades económicas que operan actualmente dentro do recinto amurallado da cidade.
O informe detalla un total de 569 locais abertos na zona, desafiando a percepción popular de que o centro histórico se atopa en declive comercial.
A pesar de que, segundo diversas enquisas previas realizadas pola propia Asociación, moitos lucenses cren que o casco histórico perdeu gran parte do seu dinamismo, os datos do censo demostran o contrario. De feito, o centro de Lugo segue sendo, con diferenza, o maior centro comercial da provincia, cunha notable actividade empresarial en diversos sectores.
Segundo o censo, o comercio segue sendo o sector predominante, con un 54,96% de presenza. Seguen os servizos, que ocupan o 23,20%, e a hostalaría, que representa o 22,32%. Estes datos contrastan coa sensación xeneralizada de que o centro xa non ten vida comercial, unha impresión que foi desmentida con números concretos.
Desde Lugo Monumental destacan que mesmo dentro da propia Asociación os resultados foron sorprendentes. Ninguén acertou completamente as cifras nunha enquisa previa realizada entre os asociados, aínda que algúns achegáronse bastante. Ademais, para obter datos máis precisos, o censo só incluíu os locais a pé de rúa, excluíndo entresous e pisos onde tamén existen actividades económicas como xestorías, peitearías e academias.
O informe resalta que, a pesar da presenza dalgunhas cadeas comerciais, a gran maioría dos establecementos do casco histórico son pequenas empresas locais. Isto outorga un valor engadido ao recinto amurallado, xa que, a diferenza doutras cidades españolas, en Lugo son as pequenas e medianas empresas as que predominan no centro, en lugar das grandes superficies ou franquías.
Lugo Monumental subliña a importancia destas pequenas empresas para a economía local, xa que, ademais de xerar emprego de calidade, os ingresos que xeran repercuten directamente na cidade, a través do pagamento de impostos e a creación de riqueza. Así mesmo, o trato cercano co cliente, característica propia dos pequenos comercios, contribúe á fidelización e ao fortalecemento do tecido empresarial.
En resumo, o censo de Lugo Monumental pon de manifesto que o casco histórico de Lugo segue sendo un motor económico clave para a cidade, albergando 310 comercios, 127 establecementos de hostalaría e 132 empresas de servizos, consolidándose como un centro dinámico e vital para a economía lucense.