Lugo prepara as festas da Milagrosa con 26 actividades para todos os públicos
Rubén Arroxo, tenente alcalde do Concello de Lugo, acompañado pola edil de Cultura, Turismo e Promoción da Lingua, Maite Ferreiro, o vicepresidente da Deputación, Efrén Castro, a deputada provincial de Cultura, Iria Castro, e representantes da comisión organizadora presentaron as festas do barrio da Milagrosa, que este ano volven cun amplo programa de actividades para toda a veciñanza.
As festas desenvolveranse entre o 3 e o 7 de setembro e contarán con 26 actividades pensadas para distintos públicos, garantindo que todos poidan atopar algo ao que asistir. Maite Ferreiro destacou a colaboración da Tenencia de Alcaldía coas comisións de festas das parroquias de Lugo, lembrando que en 2025 se apoiou a 47 parroquias cun investimento total de 21.150 euros.
A responsable de Cultura explicou que a Área de Cultura achega 450 euros para a animación musical das distintas parroquias e barrios, facilitando grupos de música de todos os estilos.
As solicitudes deben presentarse ante a Área de Cultura polos integrantes das comisións ou asociacións organizadoras, sendo avaliadas polos servizos técnicos municipais antes de asignar o grupo correspondente.