Lugo presenta unha programación de Nadal diversa que combina música, teatro e tradición
A concelleira de Cultura, Turismo e Promoción da Lingua, Maite Ferreiro, presentou a programación do Nadal 2025–2026, unha proposta cultural ampla que combina música, tradición, teatro familiar e accións de dinamización do centro histórico. Ferreiro destacou que serán 14 as actividades que darán forma ao Nadal, cunha programación pensada para todos os públicos, que reforza os espazos culturais da cidade e impulsa a participación social.
As celebracións comezarán o venres 5 de decembro ás 18:30 horas na praza Maior co acendido do alumeado de Nadal, que este ano correrá a cargo de Isidoro Rodríguez, presidente da Academia de Enfermaría de Galicia, profesor da Escola de Enfermaría de Lugo e recoñecido folklorista e presidente do Colectivo María Castaña.
Un dos piares da programación será o ciclo Corais polo recinto histórico, que se desenvolverá do 15 de decembro ao 4 de xaneiro, convertendo as rúas do casco vello nun espazo musical vivo. Máis dunha ducia de agrupacións, entre elas Cantar Delas, Coral Polifónica Xolda, Schola Gregoriana, Coral Lucus Terra, Cantigas e Frores, Orfeón Lucense e moitas máis, ofrecerán actuacións itinerantes en lugares emblemáticos como Santo Domingo, Rúa da Raíña, Quiroga Ballesteros, Praza Maior ou San Marcos. As corais realizarán pases de 20 a 25 minutos en distintos espazos, contribuíndo a dinamizar as compras de Nadal e a crear un ambiente festivo no recinto amurallado.
O Auditorio Municipal Gustavo Freire será outro dos epicentros culturais da cidade cunha programación dirixida especialmente ao público infantil e ás familias. Entre o 26 e o 30 de decembro, acollerá a cuarta edición do ciclo Medrando no Nadal, que combina espectáculos teatrais para a primeira infancia con actividades lúdicas. As entradas terán un prezo simbólico de 3 euros, con dous pases diarios ás 17:00 e ás 18:30 horas e un aforo de 80 persoas por función. Ademais, con calquera entrada será posible desfrutar previamente de Un Mar de Xogos, unha instalación creada por Bico de Toupa que permanecerá aberta entre as 16:00 e as 18:30 horas. Para quen desexe participar en varias propostas, haberá un bono de cinco funcións por 10 euros dispoñible do 15 ao 20 de decembro, mentres que a venda de entradas individuais comezará o 21 de decembro.
O ciclo de Nadal culminará con actividades de Aninovo. O domingo 4 de xaneiro ás 20:30 horas, o Auditorio Fuxan os Ventos acollerá o tradicional Concerto de Aninovo a cargo da Banda Filharmónica de Lugo, considerado un dos eventos máis esperados destas datas pola súa combinación de repertorio festivo, música sinfónica e participación cidadá. Finalmente, o 5 de xaneiro terá lugar a tradicional Cabalgata de Reis, que iniciará o percorrido ás 18:00 horas no Parque da Milagrosa e chegará á Casa do Concello ás 19:30 horas. A comitiva, formada polas súas Maxestades, carrozas temáticas e animación de rúa, percorrerá as principais vías da cidade, converténdose nun dos eventos máis multitudinarios e queridos polas familias lucenses.