Lugo recoñece o papel das mulleres do Mercado Tradicional no Día da Muller Rural
A concelleira de Participación e Servizos para a Veciñanza, Cristina López, realizou un recoñecemento a todas as mulleres que forman parte do rexistro do Mercado Tradicional de Lugo, dentro das actividades organizadas polo Día da Muller Rural, que se conmemora cada ano o 15 de outubro.
López subliñou “o importante papel de todas estas mulleres ao longo dos anos, contribuíndo a que a Praza e o Mercado sexan actualmente espazos cunha especial relevancia para as veciñas e veciños da cidade”.
A área de Participación destacou a labor de todas as mulleres que se achegan ao mercado tradicional, “un espazo integrado practicamente só por mulleres, que permite desfrutar de produtos naturais e de proximidade”.
O Mercado Tradicional celébrase no soto da Praza de Abastos nas mañás dos martes e venres, entre as 8:30 e as 14:30 horas, ofrecendo produtos da colleita e complementando a oferta de primeira calidade dispoñible na Praza e no mercado de Lugo.
O Día da Muller Rural, celebrado desde 2007 o 15 de outubro, foi establecido pola Asemblea Xeral da ONU co obxectivo de recoñecer a contribución das mulleres rurais no desenvolvemento rural e agrícola, na erradicación da pobreza e na mellora da seguridade alimentaria.
Na declaración inicial, a ONU chama aos estados membros a mellorar a condición das mulleres do rural, prestando atención ás súas necesidades e promovendo o seu empoderamento social, económico e político.