Lugopoética 2025 levará recitais e conversas literarias á UNED de Lugo
Lugo converterase nun punto de encontro para amantes da poesía coa chegada do proxecto Lugopoética 2025, unha iniciativa que promoverá conversas literarias con autores e autoras galegas durante o último trimestre do ano. A proposta, organizada pola UNED Lugo, inclúe seis encontros que se celebrarán en diferentes xoves, de outubro a decembro, e que serán retransmitidos a través da súa canle oficial de YouTube.
Cada cita terá unha duración de 90 minutos, nos que o público poderá escoitar lecturas de versos e reflexións arredor da creación literaria, nun formato bautizado como “Paso a dous”, no que participarán parellas de poetas vinculados entre si pola súa traxectoria, colaboracións ou relación familiar.
O ciclo abrirase o xoves 2 de outubro coas intervencións de Carmen Blanco García e Claudio Rodríguez Fer. Continuará o 16 de outubro cun encontro a tres voces protagonizado por Mar Ferreiro Rozas, Lucía López Cancio e Gustavo E. Díaz Rey. O 30 de outubro será a quenda de Ana Vila Portomeñe e Paco Ledo, mentres que o 13 de novembro intervirán Manuel Regal Ledo e Xosé Antón Miguélez Díaz.
A programación seguirá o 27 de novembro con Xoan Neira e Xosé Carlos Ulloa García, para rematar o ciclo o 11 de decembro, data na que se darán cita Helena Villar Janeiro e Xesús Rábade Paredes.
Dende a UNED de Lugo destacan que se trata dunha oportunidade para achegar ao público o universo poético de diferentes xeracións de autores e autoras galegas, combinando tradición e innovación. As sesións están pensadas tanto para seguidores habituais da poesía como para persoas que queiran iniciarse no xénero, convidando á reflexión e ao descubrimento da palabra poética.