María Teresa Roupeiro, prata nos Campionatos Europeos de Billar de Eslovenia
María Teresa Roupeiro, xogadora do Club de Billar Adai situado no Corgo, regresa a casa cunha medalla de prata nas súas mans tras disputar os Campionatos Europeos de Billar 2024 de Eslovenia.
Do 6 ao 16 de xullo tivo lugar a cita anual de billar máis importante do continente organizada pola Federación Europea de Billar: os Dynamic Billard European Pool Championships M-W-U23 & WHC Athletes. Durante 10 días en Podčetrtek (Eslovenia) homes, mulleres, menores de 23 anos e atletas en cadeira de rodas reuníronse para competir nas distintas modalidades oficiais de billar: 14.1, bóla-10, bóla-8, bóla-9 e
seleccións de equipos.
Pola súa banda, a atleta galega de alto rendemento Maite Roupeiro alcanzou a medalla de prata na modalidade de bóla-10, caendo só ante a alemá Pia Filler que foi tricampioa nestas probas. Ademais do seu subcampionato, Maite quedou dúas veces ás portas do
ansiado podio tras alcanzar un quito posto nas modalidades de 14.1 e bóla-8.
O seu gran logro valeulle para recibir unha invitación aos 12º World Games 2025 que terán lugar do 7 ao 17 de agosto de 2025 en Chengdu (Republica de China); a maior cita mundial de billar, ao non ser aínda este deporte olímpico.
No equipo español tamén obtiveron grandes resultados Francisco Sánchez Ruiz, ouro masculino en modalidade de bóla-8; Pelayo Cuelli Furtado, bronce Sub 23 na modalidade de bóla-9 e o equipo español masculino de España, que foi medalla de prata.