Marica Campo recibe o premio Mil Primaveras Máis da Taberna do Saa
A Taberna Cultural A Despensa do Saa entregou o premio Mil Primaveras Máis, recoñecemento que na súa primeira edición foi concedido á escritora e animadora cultural do Incio Marica Campo.
O acto contou cun recital de composicións poéticas da autora homenaxeada, unha delas a cargo da súa irmá Tareixa, quen evocou lembranzas da infancia compartida que axudan a perfilar o carácter da premiada.
A música correu a cargo de X.M. Do Castro, que acompañou a celebración cunha intervención que contribuíu a crear un ambiente íntimo e emotivo. O titular da Despensa do Saa, Xosé Manuel Saa, foi o encargado de facer entrega do galardón, simbolizado nun deseño elaborado polo artista lucense Leandro.
A entrega do premio Mil Primaveras Máis supón un recoñecemento ao labor literario e á traxectoria vital de Marica Campo, cuxa obra e compromiso cultural deixaron unha fonda pegada no panorama galego.