Martín Alemparte puxo en valor a calidade dos queixos galegos en Pedrafita
O director da Axencia Galega de Calidade Alimentaria da Consellería do Medio Rural, Martín Alemparte, visitou as instalacións do Consello Regulador da Denominación de Orixe Protexida (DOP) Queixo do Cebreiro, aproveitando a ocasión para poñer en valor a calidade dos queixos galegos representados por estas denominacións de orixe protexidas.
Durante a visita analizouse a situación actual desta DOP, que conta con tres operadores e oito gandeiros adheridos, e que leva incrementando de forma constante a súa produción certificada desde 2016. Ademais, avaliouse a posibilidade de desenvolver accións de promoción que consoliden o nivel de produción actual e fomenten a creación de novas queixerías dentro deste distintivo.
O pasado ano, a DOP Queixo do Cebreiro alcanzou unha produción superior a 60.000 quilos, cun valor estimado de preto de 760.000 euros, procedentes das zonas de montaña do leste da provincia de Lugo, reforzando así a presenza e a repercusión deste produto galego de calidade no mercado.