Melloran a estrada que conecta Antas de Ulla co futuro Parque Central de Galicia
A Deputación de Lugo iniciou os traballos de aglomerado en quente no firme da estrada LU-P-0301, unha vía estratéxica que conecta a capitalidade de Antas de Ulla co futuro Parque Central de Galicia, no lugar de Nugallás.
Esta intervención dá continuidade ás obras previas, que incluíron movementos de terras, drenaxe con colocación de tubaxes adecuadas e limpeza de cunetas.
Segundo as previsións, e sempre que as condicións meteorolóxicas o permitan, os traballos de aglomerado estarán finalizados a mediados da próxima semana. Posteriormente, procederase á colocación da sinalización horizontal con marcas reflexivas brancas, así como á renovación dos sinais verticais que presenten deterioro.
O obxectivo desta actuación é preparar a vía para soportar o incremento de tráfico previsto unha vez o Parque Central de Galicia entre en funcionamento.
Ademais, mellorarase a seguridade e comodidade da circulación tanto para os veciños e veciñas, que usan esta vía como conexión coa provincia de Pontevedra a través de Rodeiro, como para os futuros visitantes da infraestrutura.
Paralelamente a estas obras, a Deputación de Lugo iniciará os traballos de saneamento e limpeza de cunetas no camiño perimetral do Parque Central de Galicia. Este proxecto, que conta cun investimento de preto de 145.000 euros, inclúye también a aplicación de aglomerado en quente e a colocación de sinalización horizontal con pintado de marcas reflexivas brancas.
Con estas accións, a Deputación de Lugo reitera o seu compromiso coa mellora das infraestruturas viarias, garantindo unha rede de comunicación segura e eficiente para a cidadanía.