Miguel Fernández e Elena Candia reuníronse para abordar diversos temas de interese local
O alcalde de Lugo, Miguel Fernández, e a portavoz do Grupo Municipal Popular, Elena Candia, mantiveron un encontro informal, tal e como lle solicitara a popular días atrás.
Durante a conversa, abordáronse principalmente catro temas de relevancia para a cidade, aínda que, segundo o alcalde, non houbo novidades significativas respecto ao que xa se había comunicado previamente desde o Goberno Local.
Un dos puntos tratados foi a situación dos aparcamentos dos institutos en Ramón Ferreiro. O alcalde lembrou á portavoz popular que non é necesaria a sinatura dun convenio para a apertura destas prazas e pediulle que interceda ante o delegado da Xunta para que estes aparcamentos se poñan a disposición da cidadanía o antes posible, tal e como esixe a poboación.
En canto á parcela do antigo colexio do Sagrado Corazón, Elena Candia confirmou ao alcalde que a Xunta asumirá a totalidade da parcela, un compromiso que foi ben recibido polo Goberno Local. Este acordo permite á administración local planificar a medio prazo a construción de equipamentos e servizos socio-sanitarios, nunha zona que se considera o único solo dotacional dispoñible no Sagrado Corazón.
Outro dos temas abordados foi o saneamento de Esperante. A portavoz do PP informou ao alcalde sobre o compromiso da Xunta para ampliar o financiamento destinado ás obras de saneamento nesta zona. Miguel Fernández sinalou que, no caso de que este compromiso se formalice, o Goberno Local estudará o proxecto para avanzar na ampliación.
Por último, tratouse a ampliación da protectora de animais de Lugo. Elena Candia confirmou que a Xunta financiará o 33% do custo das obras de ampliación, unha colaboración que xa había sido anunciada previamente polo Concello e a Deputación. O alcalde sinalou que, se o proxecto é viable desde o punto de vista urbanístico, o Goberno Local prestará todo o seu apoio para que a ampliación sexa unha realidade o antes posible.
Valoración do alcalde
Miguel Fernández valorou a reunión sinalando que os temas tratados non trouxeron novidades respecto ao xa coñecido pola cidadanía. Na súa intervención, explicou que se atopa ultimando o acordo coa Fundación propietaria da parcela do Sagrado Corazón para cedela á Xunta en canto sexa posible. Tamén lembrou que, aínda que se está a traballar no convenio dos aparcamentos, a falta de sinatura non é un impedimento para que estas prazas se poñan a disposición da poboación o antes posible.
Respecto ao saneamento en Esperante, o alcalde indicou que se estudará a ampliación do financiamento cando se formalice o compromiso da Xunta. E sobre a protectora de animais, reiterou o compromiso do Goberno Local de colaborar na remodelación do espazo, sempre que o proxecto sexa viable desde o punto de vista urbanístico e conte co apoio de todas as administracións implicadas.