Miguel Fernández, elixido como novo alcalde da cidade de Lugo
Miguel Fernández, nado en Ribeira de Piquín no ano 1955, foi elixido como alcalde de Lugo tras a reunión celebrada este mércores na sede provincial do PSOE.
Diplomado universitario en Enfermaría, traballou no Centro de Saúde da Pobra de San Xiao, en Láncara. Ademais, presidiu o Colexio Oficial de Enfermaría de Lugo e foi membro da súa xunta directiva.
No ámbito político, Fernández foi concelleiro no Concello de Lugo, onde asumiu diversas áreas, incluída a de Transición Ecolóxica. Tamén exerceu como voceiro do goberno local e concelleiro de Medio Rural.
Na Deputación de Lugo, ocupou o cargo de deputado provincial polo partido xudicial de Lugo, con competencias en áreas como Vías e Obras.
En xaneiro de 2024, tras a saída da daquela alcaldesa Lara Méndez para acompañar a José Ramón Gómez Besteiro na súa candidatura ao Parlamento de Galicia, Miguel Fernández foi considerado o seu sucesor natural. Porén, o grupo municipal optou por Paula Alvarellos para liderar o goberno local nese momento.
Agora, os socialistas ven en Miguel Fernández o perfil idóneo para liderar o Concello de Lugo, cargo que ocupará polo menos ata 2027. A súa experiencia e carácter conciliador foron factores clave na súa elección, comunicada polo secretario xeral dos socialistas na provincia, José Tomé.
"Puxemos enriba da mesa todas as opcións para conseguir o mellor para a cidade de Lugo, levando a cabo o proxecto comezado por Lara Méndez e despois por Paula Alvarellos; e o resultado desa reunión foi decidir que Miguel Fernández sexa o alcalde de Lugo, que será proposto no vindeiro pleno municipal", explicou Tomé.
Cunha traxectoria marcada pola súa vocación de servizo e a súa experiencia en distintas áreas da administración local e provincial, Miguel Fernández asume a Alcaldía de Lugo co obxectivo de impulsar proxectos que beneficien á cidadanía e contribúan ao desenvolvemento da cidade.