Miguel Negral Fernández foi elixido como novo xefe de servizo da área de Medio Ambiente de Lugo
Miguel Negral Fernández foi elixido como novo xefe de servizo da área de Medio Ambiente do Concello de Lugo, que xa desempeñou este rol durante dous anos en comisión de servizo.
Así, foi elixido polo seu profundo coñecemento dos contratos vixentes, que inclúen algunhas das licitacións máis importantes do Concello, así como pola súa comprensión dos procedementos administrativos e as dinámicas particulares deste departamento, a diferenza dos outros candidatos.
A alcaldesa de Lugo, Paula Alvarellos subliñou que "se elixiu a Miguel Negral pola súa experiencia, habilidades técnicas, liderado e compromiso coa comunidade, co fin de lograr unha xestión eficiente do Servizo de Medio Ambiente e fortalecer o compromiso do concello coa sustentabilidade e a mellora da contorna local".
Durante o proceso de selección, tres dos cinco candidatos foron descartados por non cumprir cos requisitos da convocatoria, pertencer ao grupo A, subgrupo A2, ou non ter o nivel de formación adecuado, en comparación cos dous candidatos finalistas. Ambos os finalistas posuían unha sólida formación académica, coñecementos especializados en áreas crave do medio ambiente e máis de 20 anos de experiencia profesional, comezando ambos a súa carreira como funcionarios en 2001.
A elección de Miguel Negral fundamentouse na súa ampla experiencia na área de Medio Ambiente, onde desenvolveu integramente a súa carreira. Ten probada experiencia en xestión ambiental, proxectos para a conservación e mellora da calidade ambiental, e na provisión de infraestruturas de abastecemento e saneamento tanto en áreas urbanas como rurais da cidade. Doutra banda, o outro candidato seleccionado tiña a mesma experiencia, pero no departamento de Urbanismo e Réxime Interior, traballando no medio Ambiente nun municipio de 25.000 habitantes, unha dinámica distinta á de Lugo, que supera os 100.000 habitantes.
Ademais, valorouse a súa experiencia previa como xefe de servizo durante dous anos, o que demostra a súa capacidade organizativa para xestionar os recursos humanos necesarios para enfrontar a carga de traballo da área de Medio Ambiente.