Miñones destaca como prioritario “axilizar a reconstrución” do viaducto da A6
O delegado do Goberno en Galicia, José Miñones, achegouse esta mañá ata o viaducto da A6 que se derrubou, onte, entre Pedrafita do Cebreiro e León. Miñones informou alí das actuacións do Goberno para garantir a seguridade, favorecer o tránsito de vehículos e abordar a reconstrución do viaducto do Castro, tralo accidentes producido onte no sentido A Coruña.
O Ministerio de Transportes xa adoptou “todas as medidas necesarias para evitar maiores consecuencias e reducir as dificultades na circulación” na comunicación viaria entre Galicia e Castela e León.
José Miñones compareceu diante dos medios de comunicación en Pedrafita do Cebreiro, xunto ao diretor xeral de Estradas do Ministerio de Transporte, Mobilidade e Axenda Urbana (Mitma), Javier Herrero; entre outras autoridades.
Previamente, realizou unha visita técnica para supervisar o estado da infraestrutura na que participaron tamén o rexedor de Pedrafita, José Luis Raposo, a alcaldesa de Vega, María Luisa González; e o xefe de Demarcación de Estradas en Galicia, Ángel González, ademais do equipo técnico territorial do Mitma.
José Miñones remarcou que “a prioridade número uno é garantir a seguridade”. Nese sentido, indicou que o paso permanecerá pechado en ambos os sentidos: tanto os carrís de entrada a Galicia, que xa estaban clausurados por traballos de reparación cando se produciu o esborralle, como os de saída, que non resultaron afectados. O delegado incidiu en que “o máis importante é que non houbo ningunha vítima” e comunicou que os técnicos están a revisar toda a estrutura para garantir a seguridade de todo o tramo. Nese sentido, trasladou unha “mensaxe de tranquilidade” aos usuarios da autovía e aos veciños e veciñas da zona.
MEDIDAS
Para garantir a circulación entre Galicia e a meseta, o Goberno desviou o tráfico rodado pola estrada N-6. O Executivo trasladou toda a información tanto á Xunta de Galicia como á de Castela e León, as dúas comunidades afectadas, coas que avanzou que manterá comunicación fluída sobre este dispositivo.
Paralelamente ás medidas de seguridade e de reordenación da circulación, o delegado indicou que o Goberno puxo marcha unha investigación para analizar as causas do suceso.
“Levará tempo e por iso pedimos tranquilidade e acougo, porque a prioridade é a seguridade”, afirmou. Así mesmo, informou de que leste mesmo mércores comezaron os traballos para a reconstrución da vía, de maneira que o tránsito poida restablecerse canto antes no viaduto con todas as garantías.
José Miñones destacou que “a conexión de Galicia co resto do Estado é prioritaria para este Goberno”, polo que o Mitma poñerá todos os recursos necesarios recuperar o viaduto. Mentres tanto, o ministerio traballa “para buscar as mellores alternativas de comunicación que afecten o menos posible aos usuarios”, afirmou o delegado, que pediu paciencia e prudencia.
PROBLEMA OCULTO
O derrubamento no viaducto da A6 puido deberse, segundo distintas informacións, a algún problema oculto da estrutura que puido pasar desapercibido no proceso de revisión da zona ou ben desencadearse como consecuencia dos traballos de reparación que se desenvolven dende hai un ano.