Monterroso denuncia a improvisación do Goberno de España pola chegada de 120 migrantes ao municipio
O Goberno local do Concello de Monterroso denuncia a “total improvisación” e “falta de planificación” do Goberno de España coas persoas migrantes ao ser coñecedores a través dunha ONG que van desprazar a un establecemento de Monterroso a 120 persoas procedentes de Mali, previsiblemente o 29 de agosto.
O Concello recibiu hai semanas informacións similares a través dos medios de comunicación, momento no que se puxo en contacto coa Subdelegación do Goberno en Lugo, quen asegurou que non estaban previstos estes desprazamentos e se avisaría do contrario, sen que así fora. Pese á información facilitada pola ONG, o Goberno local de Monterroso segue sen ter ningunha comunicación oficial por parte da administración do Estado que confirme a chegada destas persoas a Monterroso, pese a que xa están na localidade.
Desde o Concello de Monterroso recordan que a vila conta cunha poboación moi importante de diversas nacionalidades perfectamente integrada e adaptada. Porén, denuncian a imposición desta nova realidade sen ningún tipo de información oficial e sen dispor, tal e como confirmou a ONG, dun estudo de integración destas persoas ou do impacto que a súa chegada suporá nos servizos sociais, sanitarios e sobre a cidadanía.
O alcalde, Eloy Pérez, lamenta a total falta de información oficial por parte do Goberno de España e considera indignante que queiran “impoñer” esta situación que xa leva días xerando alarma social na vila ante o número “desproporcionado” de persoas que trasladaron a Monterroso, preto do 10% dos habitantes do núcleo urbano. Desde o Goberno local pídenlle ao Goberno de Sánchez que facilite aos concellos información oficial sobre esta situación e aclare cales son os criterios que está a seguir, posto que a localidades moito máis grandes, como Monforte, chegaron un número moito menor de migrantes; 25 persoas en concreto.
No caso de Monterroso, sempre segundo a información da ONG, van a desprazarse á vila 120 persoas se contar con ningún tipo de estudo de integración nin información sobre as súas necesidades. Eloy Pérez amosa a “gran preocupación” que existe na vila, polo que urxen ao Goberno do Estado a dar as oportunas explicacións.