Monterroso inicia o proceso de elaboración dos orzamentos de 2026 con diálogo cos grupos políticos
O equipo de Goberno do Concello de Monterroso está a manter contactos e diversas reunións cos distintos grupos políticos no marco da fase de elaboración dos Orzamentos para o ano 2026.
O obxectivo principal é acadar un documento orzamentario beneficioso para o municipio, froito do diálogo, da colaboración e da participación activa de todas as representacións políticas da Corporación.
Durante estas xuntanzas, estanse escoitando as propostas e valoracións dos diferentes grupos municipais, co fin de presentar uns Orzamentos que recollan a pluralidade de visións e necesidades expresadas polos distintos partidos e concelleiros.
O rexedor, Eloy Pérez, destacou que a finalidade deste proceso é elaborar un proxecto de presupostos “que permita completar e reforzar os servizos municipais, mellorar as infraestruturas existentes e garantir que Monterroso continúe nunha senda de crecemento sostido”. Así mesmo, o documento prestará especial atención ao apoio ás inversións estratéxicas e á resposta á realidade económica actual do municipio.
O Concello subliña tamén a prioridade que se dará aos servizos sociais e á mellora das infraestruturas en diversos ámbitos, áreas consideradas fundamentais para asegurar o benestar da veciñanza e impulsar o desenvolvemento local.
A previsión é que o proxecto de Orzamentos elaborado polo equipo de Goberno se someta á votación do Pleno ordinario do xoves 4 de decembro.