Nacho Gálvez do Cidade de Lugo Fluvial proclámase campión de España de Dúatlon
Fin de semana histórica para o club Cidade de Lugo Fluvial, que acadou un triplete inédito no Campionato de España de Dúatlon celebrado en Cáceres. Nacho Gálvez proclamouse campión, Jarno Pousada logrou a prata e o ouro Sub-23, e Genís Grau completou o podio co bronce. Os tres forman parte do equipo lucense, que demostrou a súa superioridade na categoría élite.
Na carreira masculina, Gálvez impuxo un forte ritmo que deixou atrás ao vixente campión do mundo e de España, Javier Martín, e xogouse a vitoria cos seus compañeiros de equipo. Gañou cun tempo de 52:44, seguido de Pousada (52:47) e Grau (52:53).
Na categoría feminina, a campioa foi María Varo, do Tri Infinity Móstoles, que cruzou a meta en 1:00:58. Sara Reimondo, do Cidade de Lugo Fluvial, foi quinta, protagonizando o primeiro segmento da proba.
O evento acolleu tamén o Campionato de España de Dúatlon Paralímpico e probas para grupos de idade e para a rapazada co Pho3nix Kids by Javier Gómez Noya.