Nas reservas da provincia levaranse a cabo actuacións para enriquecer as condicións medioambientais
Foron concedidas un total de 13 axudas a outros tantos concellos, por un importe de case 260.000 euros, para apoialos nas tarefas de conservación, recuperación e rehabilitación do patrimonio natural e cultural e á sensibilización ecolóxica nas tres reservas da biosfera da provincia de Lugo: Os Ancares Lucenses e Montes de Navia, Cervantes e Becerreá; Río Eo, Oscos e Terras de Burón; e Terras do Miño.
Tal e como adiantou a conselleira de Medio Ambiente o Diario Oficial de Galicia publicou a resolución cos resultados da terceira convocatoria deste programa de axudas, a de 2021, que no conxunto das seis reservas declaradas na Comunidade se resume na concesión de 27 axudas a outros tantos concellos, por un importe de case 600.000 euros.
Un total de 13 deses municipios teñen parte do seu territorio nunha das tres reservas da biosfera lucenses e beneficiaranse dunha subvención para enriquecer as condicións medioambientais e paisaxísticas
No caso concreto da reserva dos Ancares Lucenses, os concellos beneficiarios foron Navia de Suarna e Becerreá, que recibirán máis de 55.000 euros para a colocación de paneis informativos sobre o patrimonio natural do municipio, no caso de Navia de Suarna, e para o acondicionamento e mellora de rutas de sendeirismo, en Becerreá.
Un total de cinco dos municipios que conforman a parte galega da reserva Río Eo, Oscos e Terras do Burón, xa que comparte terreos co Principado de Asturias, recibirán outras tantas subvencións, cun importe global de 77.888 euros. Os beneficiarios son Negueira de Muñiz, A Fonsagrada, Ribeira de Piquín, Trabada e Ribadeo. Grazas a estes incentivos da Xunta, levaranse a cabo actuacións de mellora e acondicionamento nas sendas, roteiros e praias; así como a recuperación dun muíño de roda horizontal en Negueira de Muñiz.
Por último, a reserva Terras do Miño absorbe case o 50% do orzamento que se concede na provincia, cunha axuda total de 125.127 euros para repartir entre os concellos de Castroverde, Outeiro de Rei, Alfoz, Cospeito, Guntín e O Páramo. Grazas a estas subvencións levaranse a cabo proxectos como a mellora do centro de interpretación da Lagoa de Cospeito ou a adecuación da casa-escola do Pereiro, en Alfoz, como centro de interpretación da natureza.
Galicia é a terceira comunidade que máis recursos obterá dos fondos europeos de recuperación, polo que convida aos concellos integrados nunha reserva da biosfera a optar a unha axuda da partida de 6,4 millóns de euros.
Resumo das axudas de 2021
Os Ancares Lucenses - 55.878,48 euros
- Navia de Suarna - 27.089,03 € - Realización e colocación de paneis informativos.
- Becerreá - 28.789,45 € - Acondicionamento e mellora de rutas de sendeirismo.
Río Eo, Oscos e Terras de Burón - 77.888,80 euros
- Negueira de Muñiz - 29.999,62 € - Rehabilitación de muíño de roda horizontal na Seira.
- A Fonsagrada - 17.560,35 € - Acondicionamento e mellora dos sendeiros da reserva.
- Ribadeo - 4.447,51 € - Mellora ambiental das praias.
- Ribeira de Piquín - 12.000 € - Realización dun inventario do patrimonio inmaterial de transmisión oral con especial fincapé nos valores tradicionais.
- Trabada - 14.950 € - Realización dun estudo sobre o seguimento e estado de conservación das especies de flora e fauna.
Terras do Miño - 125.827,42 euros
- Castroverde - 20.288,73 € - Mellora da diversidade florística na Veiga do Olmo.
- Outeiro de Rei - 28.333,33 € - Actuacións de mellora na ruta Miradoiro da Terra Chá.
- Alfoz - 25.665 € - Mellora e adecuación da casa-escola do Pereiro como centro de interpretación da natureza.
- Cospeito - 12.484,96 € - Mellora do centro de interpretación da Lagoa.
- Guntín - 26.734,56 € - Acondicionamento da ruta do Miño.
- O Páramo - 12.320,84 € - Ruta da torre medieval da Barreira.