Navia de Suarna acolle un obradoiro de igualdade e prevención da violencia de xénero dirixido ao alumnado
A subdelegada do Goberno en Lugo, Olimpia López, presentou no CPI Plurilingüe de Navia de Suarna unha xornada formativa centrada na sensibilización en materia de igualdade e na prevención da violencia contra as mulleres, dirixida ao alumnado de primaria e secundaria.
A actividade, impartida pola mestra e intérprete de música tradicional Branca Villares, propuxo unha viaxe pola evolución das mensaxes nas cancións, desde a tradición oral galega ata as músicas urbanas actuais. A través de interpretacións en directo e exemplos audiovisuais, o alumnado tivo ocasión de reflexionar sobre os contidos sexistas das letras, a educación afectivo-sexual, a publicidade discriminatoria e a hipersexualización das mulleres.
Durante o acto, López estivo acompañada pola xefa da Unidade de Violencia sobre a Muller da Subdelegación do Goberno en Lugo, María Luisa Castro, quen salientou a importancia de crear espazos de diálogo e reflexión entre a mocidade para identificar e rexeitar condutas violentas ou desiguais.
A subdelegada subliñou “a necesidade de levar este tipo de iniciativas tamén aos centros do rural, porque a igualdade e o respecto deben chegar a todo o territorio, sen excepcións”. Ademais, agradeceu ao profesorado e ao equipo directivo do CPI o seu compromiso coa educación en valores e coa construción dunha sociedade máis xusta e igualitaria.
No marco da visita institucional, López mantivo un encontro co alcalde de Navia de Suarna, José Fernández, co obxectivo de tratar diferentes asuntos vinculados á cooperación entre administracións e ao impulso de proxectos que beneficien á veciñanza do municipio.