Novos bríos para a Asociación do IV Ciclo do Campus de Lugo
A renovada directiva do alumnado sénior da sede universitaria luguesa, presidida por Cristina Pérez, busca unha maior interacción coa institución académica para complementar a oferta existente e dinamizar a “socialización” dun colectivo de arredor de 200 persoas, que atopan na coral universitaria dirixida por Bruno Villamayor unha nova alternativa de lecer.
A renovada directiva da Asociación do IV Ciclo do Campus de Lugo busca unha maior interacción coa institución académica para complementar a actual oferta de programas e servizos de que dispón, ademais de para dinamizar a “socialización” dun colectivo que xa ronda as 200 persoas e que desde o pasado mes de xaneiro conta coa posibilidade de sumar as súas voces á nova coral universitaria que dirixe Bruno Villamayor.
“A nosa intención é reforzar o diálogo co goberno da USC, a fin de artellar máis vías de colaboración”, sinala Cristina Pérez, quen vén de asumir a presidencia da Asociación do IV Ciclo do Campus de Lugo á fronte dunha directiva da que tamén forman parte Gloria Pérez, Asunción Pérez e Cosme Pombo.
“Os estudantes de IV Ciclo tamén queremos ser protagonistas da vida universitaria”, salienta Cristina Pérez, quen, arroupada polas seus compañeiros, non dubidou en comezar esta nova etapa cunha xuntanza co vicerreitor de Organización Académica e Campus de Lugo, Francisco Fraga, e co adxunto á Vicerreitoría, Antonio Álvarez.
Alén de rachar co pasado, a pretensión da Asociación do IV Ciclo do Campus de Lugo pasa por ampliar cada vez máis as oportunidades que este colectivo ofrece ás persoas maiores de 50 anos, un segmento de poboación diverso, integrado na súa maioría por persoas xubiladas da vida laboral, pero “con gañas de aprender e emprender novos proxectos”.
A organización de viaxes culturais, tal e como é o xa programado a Estremadura cara a finais da primavera, ou a celebración de relatorios e charlas divulgativas abertas á participación de todo o público interesado, continuará a ocupar boa parte das iniciativas promovidas por unha asociación estudantil sénior que quere “ser máis visible”, dicen.
Un dos escaparates a través do que este colectivo pode ampliar a súa pegada na vida social da capital luguesa é a Coral Universitaria do Campus de Lugo, unha nova formación artística orientada cara a música tradicional que comezou a súa andaina o pasado mes de xaneiro baixo a batuta de Bruno Villamayor e que xa conta con arredor de 60 voces.