Novos traballos de mantemento no aparcadoiro do HULA para mellorar as instalacións
![aparcadoiro hula ruben arroxo alexandre penas](https://lugoxa.com/wp-content/uploads/2022/01/aparcadoiro-hula-ruben-arroxo-alexandre-penas.jpg)
O concelleiro de infraestruturas, Alexandre Penas, anunciou que o Goberno de Lugo está a realizar unha nova actuación de mantemento no aparcadoiro municipal do HULA, “unha actuación necesaria que planificamos para realizar en distintas épocas do ano para garantir o bo funcionamento desta instalación”.
A concellería de infraestruturas realiza distintas actuacións de mantemento do aparcadoiro municipal en distintas épocas do ano “sempre tendo en conta a previsión meteorolóxica para garantir a mellor calidade no traballo realizado”, explicou Alexandre Penas, que engadiu “os mantementos céntranse na parte frontal do aparcadoiro, a que máis tráfico recibe cada día”. O edil de Infraestruturas lembrou que “o aparcadoiro ten unha extensión de 5.020 metros, un total de 360 prazas de estacionamento entre a parte frontal e a traseira”.
O concelleiro explicou que "o espazo de aparcamento gratuíto habilitado polo Concello supón un aforro para as veciñas e veciños de máis de 600.000€ anuais, calculando a cantidade de vehículos que esta infraestrutura pode acoller durante cada xornada".
O aparcadoiro municipal do HULA acolle, cada día, 2.520 horas de estacionamento gratuíto, un total de 604.800 horas nos 240 días hábiles do ano, o que supón 604.800€ de aforro, calculando a hora de estacionamento a 1€. Desde o Goberno de Lugo calcúlase o aforro tendo en conta unha ocupación media de 7 horas en cada unha das prazas de estacionamento.
O concelleiro de infraestruturas destacou que "unha das primeiras actuacións que realizamos coa nosa chegada ao goberno foi a mellora desta infraestrutura, para facilitar que toda a veciñanza poida aparcar de xeito gratuíto preto do hospital". Alexandre Penas destacou, entre as actuacións necesarias, a diferenciación da zona de circulación e estacionamento, ademais da colocación de cartelería informativa e valados para ordenar o estacionamento, evitando que se formen atascos por vehículos mal estacionados.