O alcalde de Guntín presenta un proxecto para mellorar a rede de abastecemento municipal
O alcalde de Guntín, Ángel Pérez reuniuse coa conselleira de Medio Ambiente e Cambio Climático, Ángeles Vázquez, para abordar a mellora da rede de abastecemento municipal.
En concreto, o rexedor informou á conselleira do proxecto para mellorar a rede de abastecemento de auga potable no núcleo de Guntín de Pallares.
Segundo a documentación presentada, a actuación, cun orzamento inicial estimado de 400.000 euros, consistiría na construción dun depósito de auga potable que garanta unha maior capacidade de subministro, así como a instalación da rede de tubaxes, pozos, arquetas e válvulas correspondentes.
Ángeles Vázquez explicou ao alcalde que o persoal de Augas de Galicia estudará o proxecto de cara a establecer vías de colaboración para acometelo.
Nesa liña, reiterou que a Xunta continuará prestando o seu apoio técnico e económico aos concellos para que poidan exercer as súas competencias de saneamento e abastecemento de xeito máis eficiente e prestar servizos de calidade á súa veciñanza.