O All Star Futbolinlugo reúne a máis de 60 futbolistas na súa quinta edición
O medio dixital Futbolinlugo, especializado no fútbol afeccionado feminino e masculino da provincia de Lugo, organizará o sábado 28 de xuño a quinta edición do All Star Futbolinlugo, un evento que serve de peche á tempada futbolística 24/25 e que reunirá algúns dos mellores xogadores da provincia no campo municipal da Cheda, en Lugo.
O All Star contará con máis de 60 futbolistas que participarán en dous partidos, un feminino e outro masculino, ademais de actividades abertas a todos os públicos, homenaxes e sorteos, facendo do evento unha gran festa do fútbol afeccionado da provincia.
Na xornada deportiva, o encontro comezará ás 16:30 horas co partido feminino entre a Selección Norte e a Sur, dirixidas por Vicky Burgo, adestradora da SG Comercial, e Iria Rey, preparadora do CD Lugo B. Nos bancos estarán tamén figuras destacadas do fútbol galego como Manu Sánchez, ex adestrador do RC Deportivo que logrou o ascenso á Primeira División en 2019, quen acompañará o corpo técnico.
Xa no partido masculino, que dará comezo ás 19:45 horas, xogadores da Preferente e Terceira Futgal enfrontaranse a futbolistas da Primeira e Segunda Futgal, baixo a dirección de Diego Barreiro, do CP Casás, e Iago Núñez, da SD Castroverde. No corpo técnico estarán tamén ex xogadores profesionais como Diego Seoane, ex do RC Deportivo, CD Lugo e actual segundo adestrador do club albivermello.
As tres principais institucións públicas colaboran na organización do evento, demostrando o compromiso e a cooperación entre administracións para impulsar o deporte local.
Ao acto asistiron Javier Arias, delegado territorial da Xunta de Galicia en Lugo; Efrén Castro, vicepresidente da Deputación de Lugo e responsable da área de Deportes; Jorge Bustos, edil de Urbanismo, Xuventude e Deportes do Concello de Lugo; e Damián Carballo, concelleiro do PP en Lugo.
Esta colaboración institucional entre Xunta, Deputación e Concello reflicte a aposta común polo deporte e a súa promoción no ámbito local, consolidando o All Star Futbolinlugo como unha cita de referencia para o fútbol afeccionado da provincia.