O Arde Lvcvs e o Camiño Primitivo mostran a Lugo coma unha cidade aberta no Fitur
![Presentación do Concello de Lugo en FITUR](https://lugoxa.com/wp-content/uploads/2022/01/Presentacion-do-Concello-de-Lugo-en-FITUR.jpg)
A alcaldesa de Lugo, Lara Méndez, explicou na Feira Internacional de Turismo en Madrid, a nova campaña promocional ‘Lugo, dez portas abertas ao mundo’, “na que presentamos unha cidade de enorme proxección grazas a dúas das nosas experiencias de maior atractivo internacional, o Arde Lvcvs e o Camiño Primitivo”.
“Lugo conxuga todos os ingredientes para estar na primeira liña das redes do turismo de calidade e non masificado, a historia, o patrimonio, a riqueza natural e as nosas xentes atraen a visitantes de proximidade, pero tamén do mundo enteiro, e temos que seguir traballando nesta liña’, dixo.
A rexedora avanzou que se deron grandes pasos no impulso do Arde Lvcvs no mundo, “só na última campaña en medios internacionais chegamos a 35 millóns de persoas de catro continentes, o que nos axudará a obter o recoñecemento de Festa de Interese Turístico Internacional”.
A alcaldesa estivo acompañada en Fitur da concelleira de cultura, Maite Ferreiro, que presentou o vídeo ‘Lugo, km 100’ para impulsar o Camiño Primitivo, e o concelleiro de Xuventude, Mauricio Repetto, que presentou o vídeo promocional do Arde Lvcvs deste ano, de formato cinematográfico.
Fitur tamén foi o escenario onde a Alcaldesa recolleu o galardón de Lugo como mellor destino turístico Tourism Women Friendly. O premio destaca a visibilización das mulleres castrexas na festa lucense de recreación histórica e foi outorgado polo xurado da Asociación Mujeres para el Diálogo y la Educación.
A alcaldesa agradeceu este recoñecemento, “porque destaca o papel que xogou a muller lucense ao longo da historia da cidade”.
O Concello realizará un acto en Lugo para entregarlle ás mulleres castrexas este galardón.