O Auditorio Fuxan os Ventos acolle o XI Encontro de Centros de Danza este sábado
O Conservatorio de Danza de Lugo convoca este sábado día 26 o XI Encontro de Centros de Danza de Galicia no Auditorio Fuxan os Ventos, no marco das actividades arredor do Día Internacional da Danza que se conmemora o 28 de abril.
O centro lucense, o único dependente da Xunta onde se poden cursar as ensinanzas elementais e profesionais na materia, organiza unha función que dará comezo ás 19.30 horas e na que participarán preto de 200 bailaríns de 19 centros da especialidade.
Ademais, esta tarde de xoves, 24 de abril o auditorio acollerá un concurso coreográfico para o seu propio alumnado, que está dedicado á bailarina e coreógrafa española Tamara Rojo, directora do San Francisco Ballet. Comezará ás 19.30 horas e distribuirá premios en catro categorías: ao mellor bailarín, bailarina e coreografía, ademais da coreografía que elixa o público asistente.