O BNG avalía os proxectos para incorporar aos orzamentos municipais de Lugo de 2026
A asemblea local do BNG de Lugo celebrou unha xuntanza para analizar e aprobar as iniciativas que a formación nacionalista propoñerá de cara aos orzamentos municipais de 2026. Durante o encontro, o tenente alcalde e portavoz do BNG no Concello, Rubén Arroxo, puxo en valor as actuacións desenvolvidas nos últimos anos e asegurou que a cidadanía “xa está a gozar de moitas das melloras impulsadas polo goberno municipal”.
Arroxo incidiu en que Lugo atravesa unha etapa de avance continuo, algo que, ao seu xuízo, se reflicte no aumento da poboación. Segundo lembrou, o Instituto Nacional de Estatística confirmou recentemente que a cidade alcanzou por primeira vez na súa historia os 100.000 habitantes, unha cifra que, tal e como indicou, xa figuraba no padrón municipal desde xuño de 2024. Para o portavoz nacionalista, este dato evidencia que “cada vez máis persoas elixen Lugo para vivir” e confirma que o municipio “segue avanzando e traballando para acadar novos logros no futuro”.
A Tenencia de Alcaldía, xestionada polo BNG, concentra arredor do 40% do orzamento municipal e abrangue áreas como Mobilidade, Infraestruturas, Cultura, Participación e Educación. O tenente alcalde anunciou que nos próximos días se darán a coñecer os proxectos concretos previstos para 2026 e remarcou que a prioridade do seu grupo é “continuar facendo de Lugo un lugar mellor para vivir”.
O responsable municipal explicou que a acción de goberno se sustenta na mellora dos espazos cotiáns da veciñanza combinada coa execución de obras que contribúan a modernizar e fortalecer a cidade. Nesa liña, considerou imprescindible ter en conta as demandas da cidadanía á hora de planificar as actuacións, xa que son as persoas que residen en cada barrio as que coñecen de primeira man as necesidades reais do seu entorno.
Finalmente, Arroxo salientou o papel da militancia do BNG nos procesos de toma de decisións, especialmente en asuntos de especial relevancia como a elaboración dos orzamentos municipais. Segundo afirmou, é a base militante quen marca a orientación política e adopta as determinacións máis importantes dentro da organización.