O BNG da Fonsagrada critica a falta de orzamentos para o 2025 e a xestión do goberno local
O BNG da Fonsagrada, a través da súa concelleira Rosa Rego, lamenta que o equipo de goberno non presente os orzamentos para o ano 2025, e que, segundo as declaracións do alcalde no último pleno, non ten intención de facelo. "Esta falta de previsión económica afecta directamente ao futuro do concello e as posibilidades de avance para o benestar da veciñanza", dix.
As entidades locais teñen a obrigación de aprobar os orzamentos para o ano seguinte antes do 31 de decembro do ano anterior. Isto significa que, para o 1 de xaneiro, todas as entidades locais deberían ter os seus orzamentos aprobados. Con todo, a finais de marzo, a falta de orzamentos para 2025 implica que o orzamento de 2024 se atope prorrogado, o que limita a capacidade de realizar investimentos e dificulta o progreso do concello.
“Aquí na Fonsagrada non temos nada presentado, isto implica que non temos un proxecto para o concello, que estamos sen rumbo, e que as cousas se van solucionando a medida que van xurdindo problemas”, afirmou Rosa Rego, criticando a falta de planificación e visión a longo prazo do goberno local.
A aprobación dun orzamento permite contar cun concello máis estable economicamente e facilita a capacidade de implementar proxectos transformadores que melloren a calidade de vida dos veciños. Neste sentido, Rego subliñou que "a nefasta xestión económica do PSOE non pode castigar á veciñanza, e iso é precisamente o que está pasando neste concello, xa que os pagamentos con reparo son continuos".
A concelleira do BNG rematou a súa intervención sinalando que esta falta de responsabilidade e planificación "págase pola veciñanza e demostra o esgotamento político do goberno actual". O BNG fai un chamamento á responsabilidade e a un cambio de rumbo que poida garantir un futuro mellor para a Fonsagrada e a súa xente.