O BNG de Castroverde celebra o convenio pola torre do castelo pero alerta de imprecisións e falta de planificación
O Bloque Nacionalista Galego de Castroverde manifestou a súa satisfacción pola recente sinatura do convenio que permitirá que a torre do castelo pase definitivamente a mans públicas, un avance que, segundo lembraron, chega case dúas décadas despois dos primeiros acordos cos herdeiros. A concelleira do BNG, Iria Castro, destacou que se trata dun paso relevante para preservar un elemento patrimonial esencial do municipio.
Con todo, a representante nacionalista advertiu de que o documento presenta “lagunas importantes” que deben ser aclaradas. Castro apuntou que non se especifican con exactitude os límites reais da doazón: mentres que no artigo II se fai referencia á torre exterior, a un tramo da muralla e á recuperación do seu contorno, no artigo V a fórmula amplíase ao “castelo de Castroverde e parcelas vinculadas directa ou indirectamente”. Segundo explicou, esta discrepancia impide coñecer con precisión o verdadeiro alcance da cesión.
Outra cuestión que suscita inquietude no BNG é a presenza dunha cláusula que contempla unha indemnización ao cedente no caso de autorizar no futuro usos terciarios, como actividades hostaleiras. A concelleira subliñou que non teñen constancia de que este tipo de condición aparecese noutros convenios asinados con diferentes herdeiros, polo que pediu explicacións sobre por que se introduce neste caso e que criterio xustifica unha cláusula tan pouco habitual neste tipo de doazóns.
O BNG tamén chamou a atención sobre o feito de que o convenio leva asinado desde outubro sen que exista ata o momento unha partida económica destinada á consolidación, estudo ou posta en valor da estrutura. Castro cuestionou as intencións do goberno local, asegurando que “é necesario saber para que quere o Concello a torre se non existe ningún plan de actuación previsto”, e reclamou que se poñan en marcha de inmediato iniciativas reais de protección, investigación e uso cultural do monumento.
A pesar das críticas, a concelleira nacionalista deixou constancia da disposición do BNG a colaborar, lembrando a falta de implicación histórica do PP na defensa do patrimonio. Ofreceuse como deputada provincial a analizar, desde a área de Cultura da Deputación de Lugo, posibles vías de apoio financeiro para impulsar a posta en valor da torre, insistindo en que o patrimonio “non pode continuar abandonado nin reducido a un titular”.
Desde o BNG de Castroverde reiteraron que a recuperación do castelo debe considerarse unha prioridade estratéxica polo seu valor histórico e polo seu potencial cultural e turístico.