O BNG de Monterroso critica a xestión da escola infantil e reclama a apertura dunha nova aula
O concelleiro do BNG en Monterroso, Brais Vázquez, amosou a súa total desconformidade coa elevada lista de agarda na escola infantil do concello, tras facerse pública a listaxe provisional de solicitudes non admitidas.
Segundo denunciou, xa advertiran desta situación no último pleno e preguntaran pola posibilidade de abrir unha nova aula, algo que o grupo de goberno rexeitou sen achegar argumentos sólidos. Vázquez subliñou que esa nova aula está autorizada pola Consellería e podería abrirse para dar resposta á demanda existente.
Desde o BNG propoñen tamén unha reorganización das prazas mediante un novo agrupamento que permita atender as solicitudes en espera.
O grupo nacionalista criticou ademais a tardanza na publicación da acta de baremación, que, segundo explicou o edil, provocou que moitas familias perdesen prazos noutros concellos, podendo quedar sen opcións para conciliar a vida familiar.
Ante esta situación, o BNG esixe ao goberno local medidas urxentes para garantir un servizo público de calidade e adaptado ás necesidades reais da veciñanza.
“A clave está nas prioridades políticas: ou se aposta polo gasto social e os servizos públicos ou se prefire investir en infraestruturas que, en moitos casos, permanecen pechadas co paso do tempo”, concluíu.