O BNG denuncia o peche inesperado do aparcadoiro do IES Ollos Grandes
O BNG denuncia que o acceso ao aparcadoiro do IES Ollos Grandes estivo pechado durante a tarde deste mércores, xa que a barreira permaneceu pechada, impedindo a entrada de vehículos nun horario no que o espazo debería estar operativo.
Así, din que o horario non se axustaba ao indicado na sinal de tráfico situada nas inmediacións, xa que ese cartel establece que o recinto debe permanecer aberto todos os mércores entre as 15:30 e as 18:30 horas, e o resto dos días laborables de 15:30 a 23:30.
O tenente de alcalde e portavoz nacionalista, Rubén Arroxo, lamentou a situación e expresou o seu desexo de que se trate dun fallo puntual. Segundo afirmou, “esperemos que sexa simplemente un erro e non teñamos que volver á situación anterior, cando foi necesaria a presión do BNG para lograr que os aparcadoiros de titularidade da Xunta de Galicia se abrisen ao público”.