O CB Breogán perfila o seu novo proxecto con renovacións e fichaxes
O Club Baloncesto Breogán comeza a deseñar o seu proxecto para a tempada 2025–2026 cunha aposta pola continuidade e novas incorporacións que achegan calidade e versatilidade ao equipo.
O director deportivo do club, Tito Díaz, realizou unha valoración da pasada campaña destacando o bo labor do técnico Luís Casimiro, cuxa continuidade xa está confirmada xunto co resto do cadro técnico.
Díaz subliñou a importancia de manter un grupo de traballo sólido que permitiu dar estabilidade ao vestiario e que servirá de base para a nova tempada, cuxa pretempada dará comezo o 31 de agosto cunha estadía na Mariña, onde se quere reforzar o vínculo coa afección da zona. Ademais, o Breogán prevé realizar unha presentación en Lugo e competir na Copa Galicia como único representante galego na ACB.
No capítulo de movementos na plantilla, o club anunciou a renovación de Dragan Apic, peza clave no xogo interior breoganista. Pola contra, o escolta croata Toni Nakić pon fin á súa etapa en Lugo despois de tres tempadas, despedíndose con palabras de gratitude cara á afección.
Entre as novas incorporacións destaca a chegada do escolta estadounidense Keandre Cook, un xogador de 28 anos e 1,96 metros que se caracteriza pola súa versatilidade e capacidade anotadora. Formado na Universidade de Missouri State, destacou na NCAA con 14,8 puntos por encontro e un notable 43% en triplas. Trala súa experiencia inicial na liga de desenvolvemento da NBA, iniciou unha carreira europea que o levou por Hungría, Francia, Macedonia, Alemaña e Australia, con medias que roldan sempre os 15 puntos por partido. A pasada tempada acumulou experiencias en Australia, China e Israel, acadando en todos os destinos cifras destacadas tanto en anotación como en rebote, e mostrando unha gran capacidade para xerar vantaxe en situacións de 1x1 e bloqueo directo.
Tamén se incorpora ao Río Breogán o ala-pívot Bakary Dibba, unha das promesas do baloncesto danés. Cun físico explosivo e gran mobilidade, chega desde o MLP Academics Heidelberg, semifinalista da Bundesliga. Con 23 anos e 2,06 metros de altura, destaca pola súa capacidade para defender a xogadores interiores e exteriores e pola súa enerxía no rebote. A pasada tempada na primeira división alemá promedió case 10 puntos e máis de 4 rebotes na fase regular, incrementando os seus rexistros nos playoffs, onde foi un dos xogadores máis utilizados do seu equipo.
O terceiro nome propio anunciado polo Breogán é o do internacional español Francis Alonso, escolta coñecido pola súa traxectoria na ACB e polo seu perfil anotador. O club lucense reforza así o seu perímetro con xogadores de diferentes perfís, mantendo a aposta por un baloncesto dinámico e con capacidade ofensiva, mentres perfila un plantel que aspira a competir con ambición na máxima categoría.