O CD Biosbardo de Lugo brilla en Canfranc con catro medallas nos Campionatos de España de Montaña e Vertical
O Club Deportivo Biosbardo de Lugo asinou unha actuación destacada esta fin de semana nos Campionatos de España de Subida Vertical e Carreiras de Montaña, celebrados en Canfranc (Huesca), nun escenario de alta montaña que será tamén sede do Campionato do Mundo de Montaña e Trail Running de World Athletics no mes de setembro.
O sábado, na proba de subida vertical, cun percorrido de 6,5 km e 980 metros de desnivel positivo ata o pico Larraca, a 2.278 metros de altitude, o CD Biosbardo sumou dúas medallas de prata grazas ao bo facer de Federico Losada e Emilio Montilla, que se proclamaron subcampións de España nas categorías M45 e M50, respectivamente. Ambos deportistas executaron unha estratexia intelixente, reservando forzas ata o último quilómetro para lanzar un ataque definitivo que lles asegurou a medalla.
Na categoría absoluta feminina, Tamara García conseguiu un meritorio 33º posto na clasificación xeral, sendo a mellor atleta galega da súa categoría.
O domingo foi a quenda do Campionato de España de Carreiras de Montaña, cun esixente trazado de 14,5 km e preto de 800 metros de desnivel positivo, desenvolto na zona do barranco de Epifanio e rematando na histórica estación internacional de Canfranc. Federico Losada repetiu éxito cunha nova medalla de prata en M45, mentres que Emilio Montilla acadou o bronce en M50 tras unha brillante remontada na baixada final, quedando a tan só 15 segundos do segundo posto.
Tamén participaron con boa actuacións Tamara García e Enara Fernández, completando unha fin de semana de éxitos que consolida ao CD Biosbardo como un referente no trail running nacional. Ademais, os resultados melloran os rexistros do club nos campionatos estatais do ano anterior.