O CD Dez Portas TM Lugo terá dous representantes no Campionato Estatal de Tenis de Mesa
O vicepresidente da Deputación de Lugo, Efrén Castro, achegouse a un adestramento do CD Dez Portas TM Lugo para expresar o seu apoio aos dous xogadores do club que competirán no Campionato Estatal de Tenis de Mesa en Tarragona.
Manuel Penalonga Pereira participará na categoría infantil esta fin de semana, mentres que Alejandro Ansede Moreno disputará o torneo na categoría Sub21 os días 28 de febreiro e 1 de marzo.
A área de Deportes da Deputación colaborará no financiamento do desprazamento dos deportistas, garantindo así a súa presenza nun evento de gran relevancia dentro do panorama estatal.
O campionato reunirá preto dun milleiro de participantes en diferentes categorías e contará cunha importante cobertura mediática para impulsar a difusión deste deporte.
O CD Dez Portas TM Lugo continúa consolidando a súa presenza nos campionatos estatais. O ano pasado, o club clasificou para a competición nacional dous xogadores xuvenís, Sabela López Saavedra e Andrés Martín Reija, demostrando a solidez do seu proxecto deportivo e a calidade da súa canteira.