O CD Lugo achega o fútbol profesional ao CEIP Casás cunha nova visita do seu programa educativo
O Club Deportivo Lugo visitou o CEIP Casás dentro da iniciativa CD Lugo na Escola que se leva a cabo en colaboración coa Deputación de Lugo. A proposta busca estreitar a relación entre o club e a comunidade educativa lucense a través do deporte.
Nesta ocasión, os xogadores do primeiro equipo Kevin Presa e Ibaider Garriz foron os encargados de acompañar ao alumnado do centro nunha xornada marcada pola proximidade e o bo ambiente. Ambos futbolistas mantiveron encontros con distintos grupos do colexio, nos que compartiron conversas distendidas, consellos persoais, anécdotas e experiencias vinculadas tanto á práctica deportiva como ao día a día do fútbol profesional.
A visita estivo tamén chea de momentos especiais para os máis pequenos, con sinaturas, reparto de tarxetas personalizadas e numerosos intercambios que espertaron a ilusión do alumnado. Ademais, os xogadores aproveitaron a ocasión para entregar invitacións a todos os estudantes do centro para asistir ao partido deste domingo fronte á SD Ponferradina, correspondente ao xa tradicional Derbi dos Ancares, que se disputará ás 18:15 horas.
Esta actividade forma parte dun programa de marcado carácter social co que o CD Lugo pretende achegarse á mocidade, promover os valores do deporte e reforzar o vínculo do club coa xuventude da cidade e da provincia.