O CD Lugo Genuine recibe a visita de Efrén Castro para coñecer o seu labor inclusivo
O Club Deportivo Lugo Genuine recibiu a visita do vicepresidente da Deputación de Lugo, Efrén Castro, quen se desprazou ata as instalacións de O Ceao co obxectivo de coñecer de primeira man o traballo social que a entidade desenvolve a través deste equipo inclusivo.
Durante a xornada, o representante provincial compartiu tempo cos xogadores e xogadoras do Genuine, interesándose pola súa rutina diaria, as súas vivencias dentro do equipo e o impacto que esta iniciativa ten nas súas vidas. O encontro serviu para poñer en valor o deporte como unha ferramenta clave para fomentar a inclusión, a integración e o crecemento persoal.
Nun ambiente marcado pola proximidade e a emoción, os integrantes do conxunto albivermello amosaron o seu entusiasmo e orgullo por formar parte dun proxecto que vai máis alá da competición deportiva, promovendo valores como o compañeirismo, o respecto e a superación.
Desde o club quixeron trasladar un agradecemento especial á área de Vicepresidencia da Deputación de Lugo polo seu apoio ao deporte inclusivo e, en particular, polo respaldo á iniciativa do equipo Genuine, contribuíndo a que este proxecto continúe medrando e xerando un impacto positivo na sociedade.
A presenza de Efrén Castro reforza o compromiso da vicepresidencia da Deputación con este tipo de iniciativas que, como a do CD Lugo Genuine, axudan a construír unha sociedade máis xusta e inclusiva a través do deporte.