O CD Lugo pecha o mercado de fichaxes coa incorporación do atacante Borja Sánchez
O Club Deportivo Lugo confirmou a incorporación de Borja Sánchez, nacido en 1996, como último reforzo do equipo para o que resta de tempada, nun acordo que inclúe a posibilidade de ampliar o contrato por unha campaña adicional. O atacante asturiano chega para reforzar o cadro albivermello nun momento clave do curso.
Borja Sánchez conta cunha ampla traxectoria no fútbol profesional español, na que destaca especialmente o seu paso polo Real Oviedo, club no que superou os 150 partidos oficiais e co que chegou a debutar en LALIGA durante a presente tempada. Formado nas categorías inferiores do propio Real Oviedo e tamén do Real Madrid, o xogador acumulou experiencia en distintos equipos do fútbol nacional.
Ao longo da súa carreira, o novo futbolista do CD Lugo defendeu tamén as cores do CF Fuenlabrada, do RCD Mallorca e do Burgos CF, ademais de vivir unha etapa internacional no Club León FC, equipo da Primeira División de México, o que lle permitiu ampliar o seu percorrido competitivo fóra de España.
A chegada de Borja Sánchez supón un reforzo de calidade para a liña ofensiva albivermella, achegando talento, experiencia e versatilidade a unha plantilla que afronta o tramo decisivo da tempada coa ambición de cumprir os obxectivos marcados. O xogador incorporarase de maneira inmediata á dinámica de adestramentos do primeiro equipo.