O Cemiterio Municipal de Lugo participa nun programa de inserción laboral
![cristina-lopez-cemiterio-traballadores](https://lugoxa.com/wp-content/uploads/2024/06/cristina-lopez-cemiterio-traballadores.jpg)
A concelleira de Participación e Servizos á Veciñanza, Cristina López, visitou o Cemiterio Municipal onde deu a benvida aos 4 traballadores que formarán parte da plantilla desta instalación municipal nos vindeiros meses, grazas á participación do Concello de Lugo nun programa de inserción laboral para persoas en situación de exclusión social. Cristina López afirmou que "con esta medida facilitamos a inserción laboral e continuamos a traballar na mellora do Cemiterio Municipal, ao realizaren traballos de limpeza, conservación e mantemento nesta instalación".
O cemiterio Municipal verá aumentada o seu grupo de traballadores con 4 persoas perceptoras da Renda de Inclusión Social de Galiza, que desenvolverán os seus labores nesta instalación municipal ao longo dos vindeiros meses. Desenvolverán o seu traballo a media xornada de luns a venres, e traballarán nas instalacións do cemiterio para garantir a boa imaxe e a limpeza das instalacións.
O Goberno de Lugo continúa a facer importantes esforzos para a mellora do Cemiterio, como a renovación da porta automática no acceso lateral, comunicando coa zona nova do Cemiterio, onde nos últimos anos se realizou unha ampliación para garantir a dispoñibilidade de espazo. Coa nova contratación, a Tenencia de Alcaldía continúa a mellora das instalacións do Cemiterio Municipal. A edil de Participación, Cristina Lopez animou a toda a veciñanza a visitar o Cemiterio de San Froilán, e a desfrutar "das distintas actividades que se organizan desde o Goberno de Lugo, como as visitas nocturnas ou as distintas actividades culturais organizadas durante todo o ano, que fixeron que o cemiterio de Lugo fose incluído na Ruta de Cemiterios Históricos Europeos e gañase o recoñecemento de National Geographic como un dos cemiterios máis bonitos do mundo".